減肥前(左), Eric腰圍達五十二吋,減肥後(右),成功收腰至四十吋,穿回昔日的褲子,鬆到甩。

頭號健康

食住減  16個月搣甩 90磅

香港人熱衷減肥瘦身,但真正成功的,沒幾多個。就連一度創造減肥神話的欣宜,最近都翻脹至 200磅,減肥真的咁難?
這邊廂,欣宜因難抵雞翼薯條的誘惑,宣布不再玩這個減肥遊戲,另一邊廂,新城電台「重磅」級 DJ艾力( Eric)卻興致勃勃地加入了。沒有纖體公司贊助,亦無絕密餐單,單靠營養師教路, Eric一邊歎住雞煲,一邊溶掉身上近 90磅的肥膏!

身高六呎三吋的 Eric,由細到大都抱着「食得唔好嘥」的飲食宗旨做人,跟他同枱食飯,他一定要掃清枱面所有食物才安樂,久而久之,身體便暴脹起來。早在學生哥年代, Eric的體重已衝破二百五十磅,踏足社會後,應酬多了,體重更是有增無減,兩年前,他開始失守「三」字頭,體重逾三百磅。
龐大的身軀,令今年只有二十八歲的 Eric,體能恍如老伯,行多幾步都氣喘;肥胖,亦為他帶來很多尷尬經歷,「試過同一大班朋友去超動感影院睇戲,我竟然肥到連椅上面嘅安全帶都扣唔埋,超無癮!」
而 Eric的自信心,也一直與他的磅數成反比,「我經常有機會喺唔同嘅活動做司儀,拍住啲歌手、藝人一齊企喺舞台上,見到人哋個個咁 fit,自己就肥成咁,我簡直覺得自己有損個活動嘅形象。」

為見女神甘願減肥

Eric以前午餐例必揀炒粉麵飯,現在則改為吃湯飯及伴以走油走醬汁的灼菜,熱量低之餘,亦不失飽肚感。

Eric不是沒試過減肥,他甚至瘋狂到試過「絕食」,只是捱不到肚餓,很快便放棄,體重亦瞬間打回原形。但今趟為了心目中的女神, Eric姑且再試一次。
「哈,上年三月,收到有個中學死黨通知,佢話年尾要結婚,仲搵我做司儀。我知道新郎哥會請好多舊同學去飲,包括一個我曾經暗戀過嘅女仔。坦白講,我不求好靚仔咁見番女神,但求唔好太樣衰,於是的起心肝減肥。」
鑑於時間緊迫, Eric決定找營養師幫手。
和很多肥人一樣, Eric既想減肥,卻又極之擔心「無啖好食」,但原來正確的減肥方法,是要「食住減」。「我真係無諗過,減肥都一樣可以約朋友食雞煲、 buffet,營養師吩咐我,減肥期間,每星期都一定要有一餐俾自己『放假』,盡情享受美食,一星期亦可以食一次甜品,咁先唔會覺得減肥係一件苦差,願意持續落去。」
但當然,除了「放假」的一餐,其餘的日子就要乖乖有節制,惟大前提仍然是要「食得飽」,不能餓着肚皮去減肥。最初, Eric對這個「食住減」的方法仍然半信半疑,刻意節食,結果就撞板。

新陳代謝低難瘦身

運動是減肥的不二法門, Eric每週跑步三次,每次至少三十分鐘。

Eric憶述︰「第一次見完營養師,佢建議我每日攝取熱量,先由 3500kcal減至 2400kcal。」其實每日可以食 2400kcal,理應很豐富,偏偏 Eric就擔心太豐富難以減磅,遂自行減少食量,「早餐我只係食一碗淨湯米,午餐食一碗雲吞麵,晚餐就更加乜都唔食,只飲一杯果汁。兩星期後,我真係急跌十八磅,但就俾營養師鬧,話咁樣做好容易拖慢新陳代謝率,以後就好難再減落去。」
養和醫院高級營養師余思行打個比喻,身體就像一台機器,當你輸入的能量一下子過少,身體就會自動啟動「省電」模式,減慢新陳代謝率,然而,燃燒脂肪非靠高新陳代謝率不可,因此食得太少分分鐘無法減磅,得不償失。
由去年三月開始, Eric前後花了十六個月時間,循序漸進地由減肥前每日攝取 3500kcal,減至現在的 1500kcal。 Eric坦言,由於營養師只要求他戒掉甜飲、煎炸食物和炒粉麵飯,其餘大部分食物,他都可以如常進食,只是逐步調減分量,例如以前可以鯨吞一碟飯,現在則減至吃半碟,因為胃口是慢慢收細的,因此並沒有捱餓的感覺。
「最困難反而係運動,當初三百幾磅,根本跑唔郁,頂多只係急步行。但隨住磅數一路跌,身體機能好咗,我而家跑三公里,都只係用二十二分鐘,亦唔覺好辛苦。」控制飲食,再配合每週三次、每次至少三十分鐘的帶氧運動,現今 Eric的磅數已回落至二百五十一磅。

減磅後食量要提升

減磅後, Eric最開心的,是可以像平常人一樣,在連鎖服裝店購買心水衣服。
「當我以前腰圍去到五十二吋,買衫嘅唯一選擇係出口店。但自從減肥後,腰圍縮番至四十吋,我終於可以同連鎖服裝店嘅衫『發生關係』了,呢種興奮嘅感覺,未肥過嘅人,係唔會感受得到。」 Eric笑不攏嘴地說。
不過, Eric的減肥大計只是成功了一半,未來的關鍵,是如何逐步把飲食熱量調高。余思行說︰「當 Eric減到目標嘅二百二十五磅,佢無可能一世只係食 1500kcal,以佢嘅身高,應該每日要攝取 2200kcal至 2500kcal,呢個過程,又係要慢慢調節。」她相信,只要 Eric繼續奉行低脂、低糖的飲食習慣,並配合運動,翻脹的機會不高。
「減肥一定要戒零食」這個觀念,令不少有意減肥的人,未減先驚。自認是減肥達人的 blogger Kay,之前亦有同樣掙扎,「你要我戒乜都得,但戒零食就真係好難。」
身高約五呎二吋的 Kay,父母開茶餐廳,吃雞翼薯條、飲汽水大,加上她是超級薯片迷,結果身上的肥膏愈積愈多,「年半前,重到一百五十三磅,成個人又肥又腫,連荷爾蒙分泌都失調,情緒好唔穩定,醫生勸我減肥。」
不戒零食只選低脂
Kay跟足營養師的指示,戒掉煎炸食物,又跟爆甜的汽水、珍珠奶茶「分手」,外出用膳小心揀飲擇食,在家入廚則奉行少鹽少油的烹調原則,但唯獨零食,她卻無法捨棄。正職是教師的 Kay坦言,工作壓力大,吃零食可以幫助她減壓,「返工嘅日子,我幾乎日日都食零食,但而家會小心睇標籤,一定揀每一百克只有三、四克脂肪嘅低脂零食。」由於食得其法, Kay即使維持吃零食的習慣,亦無礙其減肥大計,經過一年半的努力,她現已回復一百一十二磅的標準身形。
作為營養師,余思行亦不反對減肥人士吃零食,「如果真係對零食有好大需要,可以酌量減少正餐嘅分量,預留 100kcal至 200kcal俾零食,用來食朱古力、百力滋、薯片都無妨。」

減肥前的 Kay愛美食,長年累月,終食出雙下巴兼一百五十三磅來。

自言是零食狂的 Kay,減肥時也沒有戒零食,但她會花時間捐窿捐罅,四周尋找低脂、低糖的零食,以滿足口腹之慾。

魔鬼 Vs天使

每個人肥胖,總有原因,按 Eric以前的飲食習慣,絕對肥得有道理。但現在 Eric學識有營又飽肚的飲食方法,終成功減磅。

茶餐廳搵食秘笈

健怡零食之選

揀零食,最主要「三低」,包括低脂,每一百克含低於三克脂肪;低鈉,每一百克含低於一百二十毫克鈉;低糖,每一百克含低於六克糖。亦最好挑選細細包或獨立包裝的,以減少食過量的風險,令減肥大計功虧一簣。

1條
24克

魚肉腸
熱量︰ 31kcal
脂肪︰ 1克
鈉︰ 134毫克
這款是較低鈉的肉腸,而且低卡低脂,每天進食 3條,也不怕超額。

1包
100克

甘栗
熱量︰ 185kcal
脂肪︰ 1.5克
鈉︰ 0毫克
甘栗屬於堅果,低脂、高碳水化合物,是健康小食。減肥人士建議每次只吃半包。

每條
11.25克

Kit Kat
熱量︰ 57.7kcal
脂肪︰ 2.9克
鈉︰ 5.6毫克
愛吃朱古力但又要控制卡路里,可選擇威化餅朱古力,因其熱量和糖分較低。

1小包
10克

雜菜薯條
熱量︰ 48kcal
脂肪︰ 2.2克
鈉︰ 60毫克
包裝細,熱量只是 48kcal,可安心每次享用 2包。

1小包
11.2克

蝦餅
熱量︰ 48kcal
脂肪︰ 1.2克
鈉︰ 72毫克
這款蝦餅吃 2包,就有 96kcal及 2.4克總脂肪,剛好是一份低脂減肥小食。

5小包
3.8克

紫菜
熱量︰ 10.2kcal
脂肪︰ 0.2克
鈉︰ 65毫克
紫菜屬於低熱量小食,而這款不論糖、鈉含量俱低,即使多吃也不怕肥。

注︰熱量有時會以千焦( KJ)為單位,只要把這數值
除 4.2,便能計算出多少卡路里( kcal)。
資料來源︰養和醫院《一個人減肥》

話你知

中大營養研究中心推出一個免費體重管理 App「健營日誌」( My Wellness Tracker HK),用家只要透過手機輸入自己的飲食、運動、作息等資料,熱量的「收支」便一目了然,系統更會提供改善建議。有興趣可於 App Store及 Google Play下載。

減肥期間,想抵抗美食誘惑,秘訣是每餐都要有蛋白質,例如進食雞蛋,或者二至四兩低脂肉類或魚類。原因是蛋白質有助穩定血糖,同時可刺激人體分泌膽囊收縮素,這是一種控制食慾的腸胃荷爾蒙,能夠抑壓食慾。

撰文:沈雅詩
攝影:徐柏然
mailto:features@nextmedia.com