陳培基最得意的作品,是這架模仿哈利電單車而製的「哈利單車」,車身以拾來的水喉通經燒銲屈曲砌成。為整這架車他在工場足足搞了大半年,被老婆投訴「愛上一個不回家的人」。

坦白講

狂人日記

陳培基,三十九歲,外號「單車狂人」。
最愛左拆右砌,偏偏讀書是死穴,中三輟學做過印刷、地盤、小販,當雕刻家的夢想早已丟下,現時失業。
八年前開始自砌單車,上週二,他在觀塘駕駛作品「太陽能三輪車」時被警方拘捕。

 其他影片
  • 狂人日記

上週二,陳培基踩這架自製「太陽能三輪車」在觀塘被警察截停。

上個禮拜我喺觀塘遊車河,踩到開源道時幾個警察截停我。架太陽能三輪車上年先落地,除咗車頂塊太陽能板喺淘寶買,其餘都係我用爛銅爛鐵砌成,上面嘅 LED燈會一路行一路閃不知幾型仔。
原來警察幾年前已留意我,見我守規矩就冇理,今次話有人報警唔做嘢唔得,又話我冇駕駛執照呢樣嗰樣,仲收咗我架車。
我係天生破壞王,鍾意將啲嘢又拆又砌,細個志願係做象牙雕刻家。我讀書唔叻,但勞作次次好高分,我睇過嘅嘢,可以原原本本整番出嚟,試過喺嚿番梘雕個藍精靈,送俾我暗戀嘅女同學,不過冇下文。又有次數學阿 sir借咗支筆俾我,我喺個鉛筆頭度雕咗個雷米金盃,佢仲周圍拎俾人睇,不過佢嗰科我就肥佬。
我嘅創作天分,好似同香港教育制度有仇,中三我升唔到班,為搵食就同老豆一齊喺膠袋廠打工,仲講乜鬼夢想。十幾年嚟,我做過地盤,走鬼賣過手鏈,之後又印番膠袋,機械式咁搵食。直到○六年,有日我收工,行行吓唔小心掂到一架單車,個車主即刻睥住我:「小心啲呀,我驚你賠唔起!」返到屋企愈諗愈谷氣,喂你架平頭摺車頂多一萬蚊,使唔使咁寸。好,我一於自己整架靚仔過你嘅車,等啲人望我唔望你。呢一啖氣,喚醒我遺忘咗十幾年嘅天分。

喺印刷廠每日做十幾個鐘,做多一分鐘都想死,但整車我整極都唔攰,我仲去晒各區垃圾房搵水喉通、鐵板,一架車成本二百蚊唔使。我每次踩自己架單車出街,唔少人讚靚要影相,幾年前有人貪得意,插咗支「起錨」旗喺車尾,換嚟就係我俾人插囉。
早幾年政府話要發展創意產業,我以為機會嚟啦,就將我架划艇形單車申請中國國家知識產權局發明專利,話就話資助十五萬,點知最後又要我自己嘔兩萬出嚟,仲要十年後會過期,根本搵笨。一○年我踩架「哈利單車」(模仿哈利電單車)參加滙豐博愛單車百萬行,贏咗個最具創意獎,點知張證書印錯日期,大會就叫我自己下載張新嘅再印番,好尷尬。
今次出事,差佬問我仲有冇其他車,我話有, show啲相佢哋都話我勁,仲戥我唔抵,話可惜呢度唔係外國。我無錢出埠,或者我要趁今次諗吓,我心入面嗰份狂,係咪要來個終結。 A

由你開講

一切好人好事,壞人壞事,先吐為快。
你敢坦白,我敢講。
電郵: mailto:voice@nextmedia.com

撰文:莫志樑
攝影:鄭樹清